A candidatura da Ribeira Sacra ao título de Patrimonio da Humanidade deu este 22 de outubro un novo paso ao conseguir o apoio do Consello do Patrimonio Histórico Español. Este organismo, responsable de seleccionar as propostas que o Estado presenta cada ano ante a UNESCO, acordou elevar ao organismo internacional a candidatura galega de cara á súa valoración polo Comité de Patrimonio Mundial de 2021.
A galega foi a única proposta seleccionada da listaxe que as diferentes autonomías lle presentan ao Consello. A Xunta de Galicia, pola súa banda, anunciou que "previsiblemente" esta a candidatura contará cun Plan de Xestión a finais deste 2019 e sinalou que as outras candidaturas nas que está a traballar actualmente, a de Illas Cíes-Parque Nacional das Illas Atlánticas e a de Cidade de Ferrol: Porto de la Ilustración, "continúan o seu traballo con normalidade" con vistas a ser presentadas ante a UNESCO en vindeiros anos.
