Teatro da Ramboia presenta O meu mundo non é deste reino

O meu mundo non é deste reino é o título co que Teatro da Ramboia levará ás táboas a súa adaptación da Farsa do bululú de Manuel María. A montaxe, que se fixo co I Certame Manuel María de Proxectos Teatrais estrearase o vindeiro 7 de novembro no Auditorio de Ourense. Fran Lareu e Anxo García con dirección de María Peinado protagonizan esta obra na que, segundo explica a compañía "un par de trapeiros chegan a unha parada no seu camiño despois de días de longa viaxe cara á Feira do Vento. Traen consigo unha carga enorme de todo tipo de obxectos estraños: cortinas rimbombantes, paus de todos os tamaños, bolsas das que despuntan teas dunha chea de tecidos e cores, e algo que semella ser unha enorme e aparatosa mochila de madeira".

Títeres e traballo actoral mestúranse nesta proposta que destaca a importancia de contar como xeito de superar a opresión nun contorno ditatorial. A obra conta xa con 26 funcións contratadas polos diferentes concellos e administracións que colaboran na organización do certame.