Val de Láncara premia a Xurxo Souto co galardón Ramón Piñeiro Facer País

Xurxo Souto (A Coruña, 1966) será o galardoado na décimo oitava edición do Premio Ramón Piñeiro Facer País, outorgado pola Asociación Cultural Val do Láncara. O xurado, formado por unha vintena de colectivos culturais das comarcas de Sarria, Val do Neira e Corgo, valoraron o "entusiasmo e forza" coa que o músico e escritor "fai país reivindicando a lingua e a cultura e contribuíndo a que os demais, e sobre todo a mocidade, as valoremos como parte fundamental da nosa identidade como pobo". A traxectoria de Souto como músico, especialmente como vocalista dos pioneiros Diplomáticos de Monte Alto, ou como locutor de radio, dirixindo espazos de referencia para espallar a música en galego entre a mocidade foi especialmente valorada para outorgarlle este recoñecemento de honra. O obxectivo de Val de Láncara coa entrega deste galardón é poñer en valor tanto a persoas, entidades e empresas, coma colectivos ou institucións que destacaron "polo seu labor de promoción, defensa e vertebración" da comunidade autónoma de Galicia. O Premio Facer País entregarase o 2 de novembro en Láncara nunha xornada que, como noutras edicións, reunirá representantes do mundo cultural de todo o país.