Valentín Alvite gaña o XIII Premio Raíña Lupa de Literatura Infantil e Xuvenil

Antía e Daren e os pequenos detectives é o título da obra coa que Valentín Alvite se coroaba este 25 de setembro como gañador do XIII Premio Raíña Lupa de Literatura Infantil e Xuvenil. A Deputación da Coruña deu a coñecer o nome do gañador, que recibirá 6.500 euros en metálico e verá a súa obra pulicada. O xurado destacou da obra galardoada o ser "unha novela de misterio presidida polo humor" na que a "orixinalidade da historia que sae das liñas habituais da literatura infantil máis recente" cun "léxico moi coidado e unha prosa moi áxil".

O xurado, que tomou a decisión por unanimidade, acordou tamén declarar finalista a novela da escritora María López Sandez titulada A noite da deusa a sinalar o seu "moi coidado estilo nunha obra que elabora unha xenealoxía feminista coa fusión de diferentes mitoloxías cun ollar contemporáneo".

Montse Pena Presas, Antonio Manuel Fraga, Xosé Cobas e a gañadora e finalista da edición anterior, An Alfaya e Xosé de Cea, compuxeron o comité de selección, que estivo presidido polo deputado de Cultura, Xurxo Couto, e contou coa xefa de servizo da área de Cultura, Mercedes Fernández Albalat como secretaria.