AS IV Xornadas de Onomástica Galega centraranse no nome das rúas

Reivindicar e entender os nomes das rúas como descritores dun espazo pero tamén como conmemoradores dun contexto social, político e cultural é a demanda central das IV Xornadas de Onomástica Galega que organizará a Real Academia Galega no Museo de Pontevedra o sábado 19 de outubro. Na xornada presentaranse aspectos moi diversos: a conformación medieval dos nomes das rúas de Santiago e Baiona na Idade Media, a apropiación do espazo público durante a Guerra Civil e as políticas públicas de memoria ou a salvagarda da toponimia tradicional. O filólogo Gonzalo Navaza presentará unha proposta para un modelo de denominación das rúas ou de recuperación de topónimos anteriores.