Mondoñedo abre o Centro de Interpretación da Imprenta

Coa presenza do conselleiro de Cultura, Román Rodríguez, abría onte as súas portas o Centro de Interpretación Imprenta de Mondoñedo. Este equipamento, que a Consellaría sinala como "pioneiro pola súa elección temática no ámbito autonómico" desenvolveuse da man do goberno autonómico, que achegou un total de 330.000 euros para a adecuación do espazo e para o proxecto de musealización.

A nova instalación recolle material das empresas gráficas Sucesores de Mancebo, Gráficas Lucenses e Junor, e pretende abordar "a importancia de Mondoñedo no desenvolvemento da imprenta e, por extensión, da propia industria editorial moderna en Galicia" segundo explica a Consellaría. Entre as pezas máis destacadas en exposición atópanse unha máquina plano cilíndrica de 1870 fabricada en Bélxica e ideada para grandes formatos, unha Minerva Hispania semiautomática ou unha linotipia. O Centro de Interpretación sitúase na antiga Casa dos Coengos da catedral mindoniense.