O Festival de Cinema Rural Carlos Velo intégrase no FICRural

Entre os vindeiros 22 ao 28 de setembro Santiago de Compostela acollerá a primeira edición do Foro Internacional de Economía e Cultura Rural. O evento, que coordinan os colectivos Arraianos e Lareira Pop, conta co apoio do Concello e da Deputación da coruña, e integra a quinta xeira do Festival Internacional de Cine Rural Carlos Velo. Para alén dos obradoiros, proxeccións, ou as xincanas fotográficas deste programa, o novo foro incluirá unha sección dedicada ao xogo tradicional e mais unha feira orientada a amosar proxectos de emprendemento rural na que se programarán concertos e outras actividades.

O programa contará cun adianto nas fins de semana de 14 e 15 e 21 e 22 de setembro, coa iniciativa Coñece o rural, unha serie de andainas a pé e paseos en bicicleta para coñecer as parroquias do rural compostelán.

No programa, aínda por publicar, inclúense propostas como a exposición Anacos do rural, que recupera unha selección de imaxes documentais e históricas do rural de Compostela e da provincia da Coruña datadas entre 1934 e 1989. No Festival Carlos Velo proxectarase unha selección das 277 curtas recibidas a concurso, das cales 111 aspiraban a participar na categoría documental e 166 na de ficción.