Pontevedra acolle as exposicións 'Alba de gloria' e 'A intimidade da imaxe' do CCG

Tres exposicións inauguráronse o mesmo día en Pontevedra. O pasado xoves, 24 de xullo, o Pazo da Cultura acolleu a inauguración das exposicións 'Alba de Gloria de Castelao. Unha experiencia' e 'A intimidade da imaxe', con fotografías de Anna Turbau sobre a Transición en Galicia, que se poderán visitar ata o 25 de agosto. Será, nos dous casos, a terceira vez que se abran as exposicións en diferentes puntos do territorio galego. Tamén, ao tempo, o Museo de Pontevedra acollía a apertura da mostra ‘Galicia, a terra dos mil panos' na que, segundo a Deputación de Pontevedra, "por vez primeira no país se reúne unha escolma de máis dun cento de mantóns e tecidos orixinais utilizados en Galiza nos séculos XIX e principios do XX". Os mantóns pertencen ao colectivo Sete Espadelas ou a diferentes propietarios particulares. A exposición poderase visitar ata o 1 de setembro.