O CGAC ábrese ao comisariado colectivo na súa nova mostra

Desde o pasado 5 de xullo e ata o vindeiro 1 de setembro, a sede do Centro Galego de Arte Contemporánea en Compostela acolle Colectiva dun colectivo. A nova exposición xorde do programa educativo e de creación Na varanda, que procura o encontro entre o museo e a veciñanza de Santiago. As persoas que participaron neste programa actuaron como comisarias do proxecto mediante a selección dunha serie de obras dos fondos do CGAC arredor dos eixes do espello e da diferenza. Este proxecto pretende situar o público como produtor cultural dentro da institución. "Isto supón entender o comisariado como unha ferramenta para dar voz a quen normalmente non a ten nas institucións museísticas, permitíndolle crear as súas propias narrativas arredor do patrimonio e xerar un vínculo con el. Visibilizar novos discursos permite establecer novos puntos de encontro entre o público, o patrimonio e o seu contexto", explica a presentación da iniciativa.