As propostas escénicas realizadas no país están a conquistar novos espazos fóra das nosas fronteiras. Por unha banda, o prestixioso festival de Avignon contará no programa da súa vindeira edición cunha obra con selo galego. A Compagnie du Velours presentará, no marco do Off Avignon unha versión de Raclette, obra do moañés Santiago Cortegoso traducida e dirixida por Silvia Rodríguez Abal, segundo informa Erregueté. A montaxe fora galardoada co premio Álvaro Cunqueiro para textos teatrais ademais de obter o galardón ao mellor texto orixinal nos María Casares. A obra xirou no noso país da man de Ibuprofeno teatro. As representacións na cidade francesa desenvolveranse entre o 17 e o 28 de xullo.
Pola súa banda, a New York City Opera acaba de anunciar que para a súa vindeira temporada levará a escena a ópera galega O arame. O vindeiro mes de novembro a obra que conta con música de Xoán Durán e texto de Manuel Lourenzo poderá verse nun programa duplo compartido con O amor bruxo de Falla. A Asociación de Amigos da Ópera da Coruña, produtora deste traballo estreado en 2008, desenvolveu tamén as xestións para facilitar a representación do mesmo en Nova York.
