A Colectiva denuncia a desaparición do apoio á arte nas axudas á distribución cultural

A Axencia Galega das Industrias Culturais eliminou as axudas para asistir a feiras internacionais de arte na súa última convocatoria de apoio á distribución cultural. Así o acaba de denunciar A Colectiva, asociación profesional de artistas de Galicia, nun comunicado no que sinala que esta liña de axudas fica así limitada a artes escénicas e a música. A entidade sinala que "a desaparición destas subvencións ás galerías agrava una situación de total desatención a un sector cultural básico na nosa Comunidade" e lembra que o noso país non conta "con axudas específicas á produción no ámbito das artes plásticas"

Na interpretación da Colectiva, a decisión da Agadic responde a "unha concepción das industrias culturais que deixa fora á arte, nomeadamente á contemporánea e a toda unha comunidade de axentes activ@s dentro da mesma, erra as súas finalidades de apoio á cultura do país, mesmo no caso de priviliexiar criterios de rendibilidade económica". A asociación aproveita para reclamar "tanto o restablecemento desas axudas como a implantación de novas vías de apoio específico para @s produtores do noso sector". En anteriores convocatorias as galerías podían acollerse a esta convocatoria na modalidade de "subvencións para a asistencia a feiras e mercados culturais fóra de Galicia", que agora desapareceu.