A Axencia Galega das Industrias Culturais (Agadic) ven de abrir a convocatoria para as subvencións de apoio á distribución profesional e comercialización dos produtos culturais de artes escénicas e musicais dentro e fóra do noso país, fomentando a captación de públicos e facilitando o acceso da cultura galega a novos mercados internacionais. O Diario Oficila de Galicia publica hoxe as bases destas axudas dirixidas tanto a espectáculos de artes escénicas coma a grupos ou artistas musicais, que dota cun orzamento total de 460.000 euros, dos cales 230.000 euros son para artes escénicas e 230.000 euros para música. Esta partida supón un importante aumento respecto da anterior, correspondente á excepcionalidade do 2020, e recupera exactamente a contía asignada en 2019.
