AGADIC saca a licitación a coprodución de tres espectáculos de danza

Tal e como anunciara onte o director da Axencia Galega de Industrias Culturais (AGADIC), Jacobo Sutil, a Axencia fai hoxe público o anuncio de licitación para a contratación, en réxime de coprodución, de tres espectáculos de danza en calquera das súas modalidades. Esta contratación insírese no programa de coproducións de espectáculos que a AGADIC desenvolve a través do seu Departamento de Produción Coreográfica (Centro Coreográfico Galego) que non mantén unha unidade de produción propia. A AGADIC seleccionará os tres proxectos que maior puntuación acaden segundo os criterios de valoración establecidos e asinará un contrato de coprodución con cada un dos seus autores. A achega económica da axencia pública para cada contrato será, como máximo, de 18.000 euros, impostos incluídos. Segundo as bases da licitación en ningún caso esta cantidade será superior ao 80% do orzamento total do proxecto presentado, o cal coloca en 22.500 euros o orzamento mínimo a barallar para cada produción. Ademais os proxectos seleccionados poderán facer uso por cesión da sala de ensaios do Centro Coreográfico Galego (CCG).

Poderán presentar os seus proxectos as persoas, físicas ou xurídicas, así como as sociedades civís e comunidades de bens -ou calquera outra agrupación de persoas sen personalidade xurídica propia–, así como as unións temporais de empresas, dedicadas profesionalmente á produción escénica, que desenvolvan maioritariamente súa actividade na Comunidade Autónoma de Galicia. Quedan exceptuadas as asociacións e restantes entidades sen fins de lucro. Para a avaliación das solicitudes presentadas constituirase unha comisión de valoración, nomeada polo director da AGADIC, integrada por un membro do cadro de persoal da axencia, que exercerá as funcións de secretaría da comisión, con voz e sen voto, e por tres profesionais do ámbito das artes escénicas galegas. A presentación debe facer nun prazo de 20 días a contar dende mañá.