Abre en Viveiro o Museo das Minas da Silvarosa

Unha antiga escola indiana acolle as instalacións do Museo das Minas da Silvarosa, en Viveiro. A Asociación Cultural Minas da Silvarosa abría onte este espazo no que recupera a memoria desta explotación, en activo ata os anos 60 do pasado século. Medio cento de fotografías históricas, vídeos e obxectos vencellados á actividade mineira compoñen a exposición deste novo centro. Ademais, o colectivo promotor recuperou cantares populares sobre o traballo mineiro que se integraron na memoria popular da vila.

A Asociación pretende con esta inauguración dar un primeiro paso na recuperación desta memoria, e fai un chamamento a abrir ás visitas algunhas das galerías da antiga mina. Ademais, os responsables do colectivo anunciaron o vindeiro desenvolvemento de negociacións co concello para garantir un horario estable de apertura do museo.