A Fundación Otero Pedrayo premia a Luz Pozo Garza, 'a máis sublime das poetas galegas'

A Fundación Otero Pedrayo anunciou a concesión do Premio Trasalba -o galardón anual que entrega a un persoeiro da cultura galega- á poeta Luz Pozo Garza. A Fundación definiu a Pozo Garza, de 96 anos, como "a decana e máis frutífera e sublime das poetas galegas". A artista coñeceu a Otero Pedrayo e mantiveron unha relación de amizade que se plasmou en estancias na Casa Grande de Cima de Vila, o pazo familiar do escritor. Precisamente neste mes de abril celébrase o "Abril oteriano", un programa de divulgación do escritor no que o sábado 6 será o día central, co tradicional xantar en Trasalba.