O actor Carlos Blanco recibirá o premio Pedigree do Festival de Cans

Os Chimpíns de Prata serán para a actriz e presentadora Neves Rodríguez e para os veciños Paz Acuña e Rafa González

A "súa traxectoria de case tres décadas no mundo da interpretación" así como "a súa disposición sempre para traballar con creadores e creadoras novos e, sobre todo, con curtametraxistas", ademais do seu labor como cidadán crítico e persoa comprometida coa socidade valéronlle ao actor Carlos Blanco facerse co premio Pedigree do Festival de Cans. A organización do evento que se celebra no Porriño daba a coñecer onte os galardóns da súa XVI edición, que se celebrará entre o 22 e o 25 de maio vindeiros.



Deste xeito, os Chimpíns de Prata “Premio Pepe Puime" desta edición foron para a actriz e presentadora Neves Rodríguez, "que acode ano tras ano ao festival e o dá a coñecer sempre que ten ocasión", e aos veciños Paz Acuña e Rafa González, "propietarios da casa que acolle a todos os convidados e convidadas do festival no seu Día Grande e un dos nosos anfitrións máis imprescindible". Este ano, ademais, estréase o Chimpín de Prata “Premio Divina Campos”, destinado aos profesionais da comunicación, que lle será entregado á xornalista Pila Comesaña.