O Parlamento de Escritoras-es reflexiona en Pontevedra sobre os dereitos civís

O Pazo de Mugartegui, en Pontevedra, acollerá entre o 15 e o 16 de marzo o "Parlamento de Escritoras-es" organizado pola Asociación de Escritores en Lingua Galega. Baixo o título "Identidade e dereitos civís desde a escrita", o evento convocará a escritores do país e convidados foráneos ao redor de diferentes eixos temáticos. Segundo expresa a organización, "con esta actividade preténdese reflexionar, nun momento de especial gravidade no relativo á vulneración na Galiza e no Estado español de dereitos culturais, sociais, políticos, etc.". O venres 15 Haberá mesas sobre "liberdades civís e dereitos nacionais" na que participarán a profesora Carme Adán, a narradora Laura Mintegi e Clàudia Pujol, novelista e membro da directiva de Òmnium Cultural. Outra mesa, "Violencia institucional, violencia estrutural na sociedade", contará con Joan Elies Adell Pitarch, director da Institució de les Lletres Catalanes, Ana Luísa Amaral, poeta portuguesa e o escritor Suso de Toro, moderados por Mercedes Queixas. O sábado 16 de marzo celebranse sesións de traballo sobre feminismos, lingua e patrimonio cultural, medios de comunicación e poderes. O Parlamento pecharase cun acto literario-musical coa participación de numerosos membros da asociación.