A Xunta investirá 775.000 euros en recuperar a igrexa do mosteiro de Oia

A igrexa de Santa María de Oia, anexa a mosteiro do mesmo nome, verá obras de rehabilitación por valor de 775.000 euros. Así o anunciaba esta semana o conselleiro de Cultura e Turismo Román Rodríguez durante a sinatura dun convenio coa Diócese de Tui-Vigo. A xunta de Galicia cubrirá con estes fondos, que fan parte do Plan estratéxico para a protección e conservación do patrimonio cultural de Galicia, actuacións para eliminar as humidades do templo e protexer o seu retablo e pinturas murais. Ademais, e "coa finalidade de reparar, conservar, restaurar e poñer en valor o conxunto do templo, atenderase aos sistemas construtivos que configuran a envolvente do inmoble como a cuberta, os paramentos verticais, as bóvedas e os pavimentos e carpinterías, tanto polo exterior como polo interior".

Os traballos afectarán tamén aos espazos compartidos pola igrexa parroquial e o antigo mosteiro, un conxunto que leva anos en mans privadas e que viu sucesivos proxectos de recuperación para uso hostaleiro que non se chegaron a desenvolver.

En paralelo, a Dirección Xeral de Patrimonio Cultural anunciou tamén un investimento de 379.634 euros na igrexa da Trinidade, en Ourense. Os fondos destinaranse fundamentalmente á mellorar o estado das cubertas do templo, mellorando a rede de evacuación de pluviais ademais de limpar a fachada, repoñer os rexuntados deteriorados, drenar os muros en contacto co terreo e sanear os paramentos interiores. Tamén se desenvolverán accións no interior do templo como a consolidación da bóveda de barrotillo da nave, a instalación dun novo pavimento de tarima de madeira ou a renovación da instalación eléctrica.