Dous compositores galegos de música clásica estrean esta semana novas obras. Por unha banda, o vigués Jesús González protagonizará cos seus traballos un recital no National Sawdust de Nova York o vindeiro 1 de marzo. En total poderán escoitarse neste auditorio e baixo o epígrafe Music from the silence nove pezas deste autor, entre elas as estreas Plegaria de los ahogados, para trombón e Dopo il Sole, haut- lieux, para clarinete e violoncello. Esta última peza foi unha encarga do director do selo discográfico Open G Records, Chris Grymes, que coordina o recital.
Pola súa banda, a Real Filharmonía de Galicia levará ao Teatro Afundación de Vigo na noite de hoxe, 27 de febreiro, a nova obra de Adrian Saavedra. Macaréu, que naceu como unha encarga da orquestra ao compositor pontevedrés, chega a escena baixo a batuta de Jonathan Webb.
