Quico Cadaval leva a escena 'Carpe Diem' de Rubem Fonseca

Producións Teatrais Excéntricas estrea o vindeiro mércores 27 a súa nova produción, Carpe Diem, unha obra do autor portugués Rubem Fonseca. O Teatro Principal de Santiago acollerá esta estrea para a que a compañía conta en escena con Víctor Mosqueira, María Costas, Marcos Vieitez e a música en directo de Mon Orencio alias Mr. Cool. Todos eles baixo a dirección de Quico Cadaval. A trama da obra xira arredor dun adulterio duplo, no que os dous amantes de clase alta están casados. A rutina dos encontros segredos consiste en cinema de barrio e motel barato, moi lonxe do seu ambiente. Entre a fantasía do cinema e as obrigas conxugais desenvolvese este drama que acaba levando a un crime. En palco aparecerán o autor, manipulando as súas pequenas criaturas como se fosen ratos de laboratorio, os dous amantes, e un músico, poñendo melodías ao acontecer. Rubem Fonseca, o autor da obra, é un especialista no xénero negro policial. Ten sido adaptado ao cinema en moitas ocasións e, en menor medida, ao teatro. Esta é a primeira vez que vai ser representado en Galicia. A obra estará en cartel en Santiago ata o 1 de marzo e despois xa ten unha data o en Ourense, o 7 de abril, o 3 de maio na Illa de Arousa e o 9 de xuño en Sada. A compañía Excéntricas está este ano celebrando o seu 15º aniversario e ven de estrear o pasado 16 de febreiro en Vimianzo Tres Vellas (polo menos), un espectáculo de narración oral e palabras cruzadas que ten como protagonistas a Celso Sanmartín, José Luis Guiterrez "Guti" e Quico Cadaval.