Quen vaia coñecer a Rosalía será convidado a coñecer a Cela. Dentro dos actos conmemorativos do 30 aniversario (1989) da concesión do Premio Nobel de Literatura ao padronés Camilo José Cela, a Fundación Cela ven de chegar a un acordo coa súa veciña, a Fundación Rosalía de Castro que une ambas casas literarias do Concello de Padrón. Durante este ano os visitantes da Casa Museo de Rosalía de Castro, a coñecida Casa da Matanza, serán obsequiados cunha entrada para coñecer o Museo Camilo José Cela, a poucos quilómetros de alí, no lugar de Iria Flavia. Con esta entrada de balde é de supor que aumentará o fluxo de visitas que compartan ambas institucións veciñas que representan a dúas figuras literarias de referencia universal malia que moi distintas entre si. A entrada non inclúe o servizo de visita guiada.
