Ao longo da última semana a Coordinadora de Traballadores/as de Normalización da Lingua estivo a facer públicos, na súa canle de Youtube, os vídeos que recollen as intervencións do último LGx15. O encontro de Ideas para o Futuro da Lingua desenvolveuse o pasado mes de novembro na Sala Capitol de Santiago de Compostela con intervencións a cargo de Javier Balea, Eira Losada, Mercé Barrientos, Inma Gil Rosendo, Manolo Maseda, Xema Varela, Ruth Caramés e o youtubeiro Aquel-e. Canda a eles, houbo unha actuación musical de Brais Morán nunha gala que conduciron Alba María e Lupe Blanco. A canle acolle tamén un vídeo resumo da última edición.
