Localización das pallozas afectadas
Catro pallozas situadas no Cebreiro, a Palloza Museo, a do Quico a de Campelo e a de Galán, verán ao longo dos vindeiros meses obras de restauración por valor de 180.000 euros. A Consellaría de Cultura e Turismo anunciaba esta fin de semana a licitación das obras, que prevén a substitución do colmo de palla das cubertas, que será completa en tres delas, ademais da reparación da estrutura de madeira da cuberta da Palloza Museo. Canda a isto, repararase o lousado dos accesos e canles perimetrais, melloraranse as instalacións electricas e aplicaranase tratamentos para evitar ataques de insectos ás estruturas de madeira. A previsión é que os traballos se desenvolvan na primeira metade de 2019, con vistas a ter o conxunto en boas condicións para o vindeiro verán.
