Máis do 35 por cento dos directivos culturais en Galicia foron nomeados por libre designación

Máis dun 35% dos directivos de entidades culturais foron designados por procedemento de libre designación. Así o analiza un informe do Observatorio da Cultura do Consello da Cultura Galega que investiga o xeito no que as entidades culturais se dotan dos seus responsables directivos. A análise, que estuda tanto institucións públicas como privadas, amosa que "nun 26,1% dos postos non hai transparencia suficiente para determinar o procedemento e no 9% utilizouse outro tipo de nomeamento". O informe tamén sinala que no 29,5% das prazas directivas optouse pola forma do concurso público. Nas recomendacións do informe o CCG pula por "impulsar un debate para estudar en profundidade a complexidade do fenómeno da provisión de postos directivos no ámbito cultural dende unha perspectiva legal, social e política".