Proxecto de mural de Salvador Aneiros para Eirís
Salvador Aneiros, Iria Fafián, Xulia Pisón, Leo López, Sekone, Paula Fraile e mais os colectivos Sen ánimo de nome e Kasomiso crearán murais en sete espazos da cidade da Coruña. O Concello presentaba o pasado venres a iniciativa Ruarte, co que a cidade se suma á tendencia de recuperar espazos degradados ou abandonados con creacións pictóricas. O proxecto, que conta cun orzamento de 60.000 euros comezará cunha intervención sobre o depósito de auga de Monte Alto e irá desenvolvéndose de xeito progresivo. Segundo adiantou a concelleira de Medio Ambiente, María García, o proxecto ten vocación de continuidade e está previsto que se realicen dous murais máis, dentro da acción do departamento de Igualdade e Diversidade.
