Galicreques chega á súa XXIII edición con 25 espectáculos en cartel

Un total de 25 espectáculos daranse cita na vixésimo terceira edición de Galicreques, o festival de títeres de Compostela. Entre o 13 e o 21 de outubro compañías de Arxentina, Brasil ou Venezuela, ademais de formacións galegas e do resto do estado español visitarán a capital galega para amosar o seu traballo cos bonecos.

As funcións, que se desenvolverán entre o Teatro Principal, a sede da Fundación SGAE, o Teatro Principal, o Salón Teatro e diferentes rúas e prazas da cidade, inclúen sesións específicas para bebés, como a que achegará Xarop Teatre, ou a coprodución galego-arxentina Viaje a un país de Cortázar, que desenvolven Tres Tigres, Chachakün e Títeres Cachirulo.
Home, dos madrileños de Mazzú Teatro, e mais Réquiem por un monicreque, obra de Roi Vidal que foi Premio Barriga Verde e que representará Monicreques de Kukas, son algunhas das propostas destacadas do festival. Canda a elas, estarán presentes compañaís como Teatro de Medianoche, Arlequín y los juglares, Fantoches Baj, La Mar de Marionetas, Larei Lará, Julia Sigliano ou PTV-Clowns.

O encontro iniciará xa o vindeiro día 8 de outubro as funcións destinadas a escolares. Serán un total de trece sesións, que queren achegar o mundo dos títeres ao público máis novo e que inclúen obras a partir dos dous anos de idade e ata Bacharelato. Esta xa aberto o prazo no que os centros de ensino poden facer reservas para levar os seus alumnos a estes espectáculos.