Xabier P. Docampo. Fotografía de Distrito Xermar para a AELG
Xabier P. Docampo, un dos máis celebrados autores de literatura infantil e xuvenil do noso país, faleceu esta noite aos 72 anos de idade. O escritor acumulara na súa estensa carreira recoñecementos como o Premio Nacional de Literatura Infantil e Xuvenil de 1995 por Cando petan na porta pola noite e a nivel internacional os seus traballos fixeron parte da lista de honra do IBBY e mais dos White Ravens. Na escrita para adultos aínda no pasado mes de maio os premios Gala do Libro recoñeceron A nena do abrigo de astracán, unha das súas obras máis recentes. Para alén do seu labor literario, Docampo desenvolveu un intenso traballo como ensinante e a través de Nova Escola Galega, ademais de ser un dos promotores da Asociación Galega do Libro Infantil e Xuvenil Gálix.
