A galega Miriam Iglesias faise cun galardón no European Comic Schools Contest

A alumna da escola de banda deseñada O Garaxe Hermético Miriam Iglesias acaba de se facer cun dos tres galardóns na categoría de ilustración do European Comic Schools Contest 2018. Este certame, ao que se presentaron trinta escolas de banda deseñada de todo o continente, seleccionou o seu traballo Halloween Tales como un dos tres premiados na ilustración. O xurado, composto polos debuxantes de manga Ken Niimura e Yoshiyasu Tamura, destacou a calidade da composición da ilustración e a orixinalidade dos personaxes.

En paralelo, o pasado día 21 entregáronse os galardóns AX1 de Banda deseñada, que convocan o IES Arcebispo Xelmírez I, coa colaboración da Secretaría Xeral de Política Lingüística e da Asociación Cultural Colectivo Xelmírez. Na categoría de 12 a 16 anos a gañadora deste galardón foi Delia Vázquez González pola obra O que ve, mentres o segundo premio da categoría foi para Prexuízos virtuais, de Raquel Cambeiro Fernández. Nos traballos de maiores de 16 anos fíxose co primeiro premio Isela Rodríguez Mascato por Triste inocencia e levou o segundo Anaïs Cerezal por Mosquitap.