Galaxia presenta unha colección para lectorado con diversidade funcional

A editorial Galaxia presentará mañá unha nova colección: Lectura Fácil. Trátase dun formato dirixido a aquelas persoas que teñen "problemas para ler, ben porque o galego non é a súa primeira lingua, porque tivo unha alfabetización tardía e para persoas con trastornos da aprendixaxe ou diversidade funcional". O primeiro título, que será presentado mañá venres ás 12:00 h. no Museo Meirande (Rande) é 20.000 leguas de viaxe baixo dos mares, de Jules Verne, adaptado pola Asociación Juan XXIII. Galaxia afirma que "defende con esta nova colección o dereito das persoas ao acceso á información e á cultura en galego independentemente da súa situación".