Abre o Centro de Interpretación de San Martiño de Mondoñedo

A que se considera como a catedral máis antiga de España, San Martiño de Mondoñedo (Foz), xa conta co seu propio centro de interpretación. O venres pasado inaugurouse nas dependencias anexas á basílica un espazo expositivo que introduce o visitante na fascinante historia do monumento e da súa diócese, fundada orixinalmente por britóns. O centro explica os frescos románicos, amosa documentación e réplicas dalgúns dos seus tesouros de orfebrería, percorre as fases máis antigas da documentación, repasa a vida de San Rosendo, quen foi bispo de San Martiño e dá conta das diferentes modificacións que sufriu o edificio ao longo do tempo. O Centro de Interpretación está aberto de martes a sábado, de 10:30 a 14 h. e de 16:00 a 20:00 h. Os domingos abre de 10:30 a 13:00 h.