Unha gala no Teatro Colón da Coruña a noite do pasado venres daba a coñecer os proxectos vencedores da segunda edición do certame Youtubeiros. O xurado, composto por Laura Cruxeiras, Iván Capón, Estela Romasanta, Adrián Dios e Anxos Sobriño seleccionou os gañadores entre os 230 proxectos presentados. Na categoría de vídeo-facermos, o gañador foi o vídeo Como escaquearse dunha comida familiar, de As cousas do Choio. Entre os proxectos de vídeo-opinarmos, foi galardoado A expedición Balmís e a vitoria da vacinación, de Xacobe de Toro Cacharrón, mentres o premio á mellor canle levouno Nubes Baixo ti. Cada un dos premiados levan 1.000 euros de premio.
O galardón de creatividade foi para Os cazapantasmas vídeo-facermos, de Moustache Media Producciones, mentres O galego Fermoso (e o que non o é tanto) de Aquel-e levou o de eficiencia comunicativa. A categoría da calidade técnica conquistouna Viaxar, de Aarón Vilariño Figueiras, e a de calidade lingüística foi para Reivindicación oceánica, de Xosé Iglesias. Finalmente, o premio a proposta Youtubeira, recoñeceu o vídeo Como dar cartos ás agachadas, tamén da canle As Cousas do Choio. Estes galardóns contan cunha dotación económica de 500 euros.
