De Estudios Abertos achega á poboación da Coruña 50 espazos creativos

Cincuenta estudios da Coruña nos que traballan un total de 92 artistas fanse accesibles á poboación na terceira edición do programa De estudios abertos. O Concello da Coruña presentaba onte esta iniciativa que "permite á cidadanía achegarse á produción e proceso creativo dun xeito accesible, á vez que descubre fórmulas de traballo vinculadas ao mundo artístico". Este sábado 7 de abril as persoas interesadas poderán achegarse a estes espazos creativos marcados nun mapa e que acollerán concertos, recitais poéticos e outros eventos. Segundo explicou Jano Muñoz, coordinador da iniciativa, os participantes poderán encontrarse cos artistas "dun xeito informal, como se fose unha inauguración, ou presentación, dunha obra".