Portas abertas en Ourense aos talleres de artistas

A Iª Edición de Estudios Abertos Ourense, permitirá visitar os talleres dos máis representativos artistas con base en Ourense entre o 25 e 27 de outubro. En total serán máis de 25 artistas en 14 espazos os que darán acceso público aos seus lugares de creación neste evento que nace da Asociación Cultural A Maquinadora, e que conseguiu, coa implicación das entidades e empresas participantes, coordinar a primeira acción destas características no contexto da arte contemporánea ourensá. A Galería Dodó Dadá acolleu a presentación do programa completo desta edición inaugural que contou coas intervencións de Anxo Lorenzo, Director Xeral de Cultura en representación da Xunta de Galicia, Miguel Mosquera, de Artesáns reposteiros Fina Rei, Tomás Lijó en representación do CIFP A Farixa e Viky Mociños en representación de A Maquinadora.

A proposta, ofrecerá ao publico a posibilidade, durante esa fin de semana de visitar de xeito libre e gratuíto calquera dos estudios participantes, espazos diseminados pola cidade e os seus arredores. A modo de festival converterá a cidade de Ourense e algúns espazos dos concellos de Taboadela ou Coles, que tamén colaboran, nunha sorte de exposición ou feira descentralizada, permitindo á veciñanza e visitantes, achegarse a arte de primeira man, coñecer en primeira persoa aos creadores e deste xeito contribuír a amosar un traballo que as máis das veces, pese á veciñanza, pasa por descoñecido para os máis próximos. Entre outros, faranse accesibles o estudos de Marcos Viso, Isabell Seidel, Leandro Sánchez, David Gesto, Ferrer, Marta Dorribo, Sula Repani, Manolo Figueiras, Xosé e Rosendo Cid ou Baldomero Moreiras. A través da páxina web www.estudiosabertos.com, o público poderá acceder a un mapa xeolocalizdo dos talleres, e toda a información sobre os espazos e os artistas participantes.