O escritor nado en Bos Aires Xurxo Alonso acaba de se facer co Premio Xosé María Díaz Castro de Poesía polo seu poemario Oracións profanas. O xurado, composto por Ánxela Gracián, Miguel Anxo Fernán Vello e Armando Requeixo, destacou "a poderosa voz oracular que destila a trintena de poemas deste libro, cheo de resonancias épicas" e mais a "selección léxica admirable, que tece o verso nun laio clamoroso a través do cal revisita os grandes temas da poesía de todo tempo e do noso tempo". O autor recibirá 2.000 euros en metálico e verá o libro publicado en Espiral Maior. O galardón entregarase o vindeiro mes de outubro no Concello de Guitiriz, entidade que organiza o certame.
