A colección de novela gráfica de Rinoceronte Editora semella estar a vivir un novo impulso logo de varios anos sen novidades. Ao lanzamento de Maus o pasado ano súmase agora Pyongyang de Guy Delisle. A aclamada obra na que o autor narra as súas visitas a Corea do Norte conta foi vertida á nosa lingua por Belén Poutón e contou co apoio dunha axuda da Xunta á tradución.
Pola súa banda, a editorial estadounidense Dark Horse anunciou para o vindeiro mes de maio o lanzamento do número un da segunda serie de Ether. O ourensán David Rubín continúa a traballar os guións de Matt Kindt nas aventuras entre dous mundos desta historia, que leva por título Ether: The Copper Golems. O autor, que continúa tamén coa publicación de Rumble en Image, acaba de ver atrasada a publicación de Cuaderno de tormentas da man da vasca Astiberri por un problema na impresión que levou a retirar a primeira tiraxe do título cando ía ser distribuída.
