O Festival Atlántica leva a narración oral a oito concellos

Son sete días, oito concellos galegos, 25 artistas de diferentes países e 52 funcións, no festival de narración oral de máis envergadura de Europa. O Festival Atlántica de Narración Oral presentouse esta mañá en Compostela para reivindicar a capacidade de Galicia como creadora e acolledora da palabra e o imaxinario oral. Nesta sexta edición do festival, que se celebrará entre o 13 e o 18 de marzo, participan os concellos de Santiago, Teo, Lalín, Pazos de Borbén, Vigo, Ferrol e A Coruña, nunha programación en diferentes espazos e para distintos públicos, de bebés a adultos. A directora do festival, Soledad Felloza, destacou que a vontade do festival é "traballar en rede con concellos de diferentes tamaños para pdoer traer unha programación diversa". Os artistas desta edición chegan de diferentes territorios: desde Brasil ou Madeira, ata Camerún, Canarias ou Valencia, pasando por boa parte das narradoras e narradores galegos.