Eduardo Cunha Tatán recibirá o premio Maruxa Villanueva

Fundador de Tanxarina Títeres e veterano da nosa escena, Eduardo R. Cunha Tatán acaba de ser galardoado co XVII Premio de Interpretación Teatral Maruxa Villanueva. O xurado, composto por Afonso Becerra, Carlos Biscainho, Comba Campoy, Inma López Silva e Roberto Pascual recoñeceu a "longa traxectoria e o maxisterio no teatro de obxectos" e mais "á construción dun teatro de títeres galego moderno". Segundo destaca resolución do xurado, "a carón de Tanxarina Títeres proxectou internacionalmente a produción galega de teatro de obxectos, con especial atención á lusofonía" e co seu traballo de base "contribuíu á creación de novos públicos para o teatro a través da Mostra Internacional de Títeres de Redondela". O premio, dotado con 1.200 euros, entregarase o vindeiro mes de novembro.