A Xunta inicia as xestións para declarar BIC o campamento romano de Bande

A Xunta iniciou o proceso de incoación do campamento romano de Aquis Querquennis, en Bande, como Ben de Interese Cultural, a máxima categoría de protección do patrimonio cultural de Galicia. O xacemento, segundo a Xunta, "presenta un gran valor histórico e arqueolóxico e trátase, dentro dos existentes en toda a Península Ibérica, dun dos máis extensamente escavado, investigado e posto en valor". A proposta de declaración da Xunta inclúe tamén varios restos arqueolóxicos que están por fóra do recinto campamental: a mansio (pousada) ao carón da vía romana XVIII que se atopa nas proximidades do campamento. A publicación do expediente no Diario Oficial de Galicia é o primeiro paso cara a declaración do BIC.