O cumprimento do convenio laboral da interpretación será requisito para optar aos premios María Casares

A Asociación de Actores e Actrices de Galicia (AAAG) ven de convocar os XXI Premios de Teatro María Casares, cuxa gala de entrega se celebrará o vindeiro mércores 21 de marzo no Teatro Rosalía de Castro da Coruña. Nas catorce categorías destes galardóns poderán participar todos os espectáculos de teatro de actor en lingua galega estreados entre o 1 de xaneiro e o 31 de decembro de 2017. A Xunta Directiva da AAAG inclúe nesta edición modificacións nas bases dos premios co obxectivo de velar que todas as compañías participantes nos María Casares cumpran co I Convenio de Actores e Actrices de Teatro de Galicia, que rexe as relacións laborais entre intérpretes e as empresas en vigor dende 2009. Toda vez que son as compañías produtoras as responsables da inscrición das candidaturas a AAAG resérvase a potestade de solicitar da compañía documentos que acrediten o cumprimento dos convenios laborais vixentes para formalizar a súa inscrición nas candidaturas. Este novo requisito é coincidente coas reivindicacións e defensa do convenio que a AAAG sempre mantivo.