Rodrígo Riveiro acada o Premio Artesanía de Galicia

A Fundación Centro Galego da Artesanía e do Deseño desvelou onte o destino dos seus galardóns anuais. O Premio Artesanía de Galicia 2O17, dotado con 6.000 euros e que recoñece a obra que representa unha artesanía competitiva polo seu deseño, adaptación ou conservación de técnicas e valores tradicionais, a incorporación ás tendencias actuais ou a innovación, recaeu nesta edición na peza A cunca en minifundio de Rodrigo Riveiro do obradoiro Ferraxe de Prata, en Teo. Este artesán destaca pola creación de pezas únicas e exclusivas dándolle unha nova oportunidade aos materiais, como a louza vella e rota. A obra gañadora é un colar de formas xeométricas e orgánicas a base de louza e prata. Na súa intervención durante a entrega dos premios, o conselleiro de Economía, Emprego e Industria, Francisco Conde, destacou que a artesanía galega está en auxe, con preto de 3.000 artesáns rexistrados e máis de 60 tendas e 550 obradoiros, un sector que dá emprego a máis de 5.000 persoas e que se está a consolidar como unha vía de dinamización económica e turística, especialmente no ámbito rural.

O Premio Traxectoria 2017, un galardón honorífico, sen dotación e que pretende recoñecer a carreira profesional así como a contribución do premiado á promoción da artesanía, foi para Obdulia Rodríguez González Lula, de Sober (Lugo). A homenaxeada dedicou 30 anos da súa vida a recuperar e dar a coñecer a olería tradicional de Gundivós. Por último, o Premio Bolsa Eloy Gesto, que premia con 4.000 euros a candidatura que presente unha proposta para a súa formación nun centro de referencia no eido da artesanía e o deseño, entregouse a Paula Ojea, de Ojea Studio, en Vigo. Esta ceramista e enxeñeira combina as súas dúas paixóns nas pezas que realiza a man de xeito individual, o que as dota dunha combinación de precisión e irregularidade, exactitude e singularidade que as fai únicas.

Peza gañadora. Cunca en Minifundio de Rodrigo Riveiro, de Obradoiro Ferraxe de Prata. Fotos: Fundación Centro galego de Artesanía e Deseño

Peza gañadora. Cunca en Minifundio de Rodrigo Riveiro, de Obradoiro Ferraxe de Prata. Fotos: Fundación Centro galego de Artesanía e Deseño