Estíbaliz Espinosa. Fotografía de Sandra G. Rey. Fonte: Afundación
Ás seis e media da tarde de onte a sede de Afundación Santiago de Compostela acollía a presentación do fallo do xurado do XV do Premio de Poesía Afundación. O poemario As neuronas irmás valeulle á coruñesa Estíbaliz Espinosa os 6.000 euros do galardón, ao se impor sobre os outros 28 traballos aspirantes. O xurado, composto polas escritoras Berta Dávila e María Neves Soutelo; Mario Regueira, escritor; Xabier Castro Martínez, escritor e secretario do xurado; e Luís González Tosar, presidente do Centro PEN de Galicia e presidente do xurado, destacou da obra "a coherencia dun discurso poético sólido, o potencia evocador das imaxes, así como a orixinalidade das referencias que apelan á dimensión científica do ser humano biolóxico e emocional". O traballo sairá publicado na colección Arte de trobar. O PEN Clube e Afundación organizan este galardón, patrocinado pola Xunta de Galicia.
