Miguel Anxo Fernán Vello. Santos-Díez (Ollo de Vidro-ACAB) (2007). Fonte: AELG
Duración da penumbra é o título do poemario co que Miguel Anxo Fernán-Vello se facía onte co XIII Premio de Poesía Afundación. O galardón, dotado con 6.000 euros e que inclúe a publicación do libro na colección Arte de Trobar, está convocado polo PEN Clube co apoio da Consellería de Cultura e Educación e de Afundación. O xurado, composto por Luís González Tosar, Óscar Xabier Castro Martínez, Inma López Silva, Manuel Guede Oliva e Luciano Rodríguez Gómez, destacou a "a aposta polo dominio das formas e pola intensidade dos rexistros" da obra gañadora. Ademais, apuntou que o poemario "é unha unidade compacta que consegue, con grande habelencia e talento, extraer da realidade máis crúa o lirismo máis elevado". Fernán-Vello impúxose co seu traballo entre os 43 orixinais que se presentaron ao galardón, dos cales tres foron rexeitados por non cumprir as bases.
