A Fundación Vicente Risco analiza o papel da muller no crime do XIX

Neste mes de outubro, a Fundación Vicente Risco realizará dúas actividades tradicionais na súa programación. O día 21 de outubro ás 12:00 entregará no castelo de Castro Caldelas o XXI Premio Vicente Risco de Ciencias Sociais, que este ano recaeu en Roberto Fernández. No acto presentarase o ensaio gañador: Enfermos pobres, médicos tristes. Historia crítica da medicina rural en terras esquecidas. E o seguinte sábado, 28 de outubro, celebraranse en Allariz, na Fundación Vicente Risco, as VII Xornadas Romasanta, desta volta vinculadas á análise de xénero. A profesora de Dereito Penal Natalia Pérez Rivas falará do tratamento penal da muller no século XIX e a catedrática de IES Carme Adán achegarase á figura de Romasanta a través da xerarquía de xénero.