San Simón inicia unha nova xeira de Con barqueira e remador

Por sexto ano consecutivo, a Illa de San Simón convértese desde hoxe e ata o vindeiro 21 de outubro en sede do Obradoiro Internacional de Tradución Poética Con barqueira e remador. Os poetas Francesca Cricelli, Rita Dahl, Estevo Creus, Antón García, Hu Xudong e Tomica Bajsic participan na iniciativa que coordina Yolanda Castaño e na que cada un deles traducirá e interpretará textos dos demais. Como principal novidade desta edición destaca que a lingua de traballo será por vez primeira o portugués no canto do inglés como ata o momento. Segundo destaca a presentación desta xeira, esta modificación xorde "desafiando a anglófona hexemonía lingüística actual". Como parte do programa desenvolveranse tres recitais multilingües os días 18, 19 e 20 na Casa da Luz de Pontevedra, no Instituto Camões de Vigo, e na Casa da Cultura de Redondela, todos eles ás 20 horas.