As Illas Atlánticas xa son aspirante oficial a Patrimonio da Humanidade

O vicepresidente da Xunta, Alfonso Rueda, e o conselleiro de Cultura, Román Rodríguez, explicaron o venres que a candidatura para que as Illas Atlánticas aspiren á designación por parte da UNESCO como Patrimonio da Humanidade (na categoría de bens naturais), foi aprobada por unanimidade no Consejo do Patrimonio Histórico Español, na coñecida como Lista indicativa. O Estado debe agora comunicar ao Centro de Patrimonio Mundial da UNESCO que a proposta está aprobada para que sexa incluída na Lista indicativa global e permanecer alí un ano antes de que a UNESCO debata sobre a proposta e finalmente decida a súa inclusión neste selecto clube de monumentos e espazos naturais.