Fonte: Web de Prada
A recoñecida casa de moda Prada acaba de presentar a súa colección de muller para a primavera/verán de 2018, cunha clara homenaxe á banda deseñada. En concreto, a marca apostou nesta serie de prendas por recoller debuxos de oito creadoras de banda deseñada de todo o mundo, entre elas a debuxante arousá Emma Ríos. Prada sinala que as seleccionadas retratan mulleres no seu propio xeito único de empoderamento. Canda a Ríos, Brigid Elva, Jöelle Jones, Stellar Leuna, Giuliana Maldini, Natsume Ono, Trina Robbins and Fiona Staples fan parte desta iniciativa.
Pola súa banda David Rubín continúa o seu acelerado ritmo de produción e anuncia para decembro a publicación da primeira entrega de Rumble. O ourensán toma o relevo de James Harren aos lapis da serie, con guión de John Arcudi. Unha historia de acción e misterio sobrenatural que verá a luz en Estados Unidos da man da editorial Image en volumes de 32 páxinas. En paralelo, a editora vasca Astiberri acaba de presentar Olimpus, unha serie de sete poemas visuais que foran publicados na extinta revista Humo e que agora o autor recupera, con cor e adaptados ao formato dixital. O volume, que se publica exclusivamente en edición electrónica, está dispoñible para descarga desde hoxe.
Continúa tamén a súa carreira Martín Romero, que dá a coñecer da man da editorial La Cúpula o seu novo traballo. La deuda é unha novela gráfica de 288 páxinas nas que o autor narra a historia dun humorista arruinado e os seus problemas por mor dunha importante débeda económica.
