Coa recepción de visitantes e unha cea comezan esta noite as actividades do III Congreso Internacional de Observadores de Nubas. A Granxa de Barreiros, en Sarria, acolle ata o vindeiro domingo este encontro, único no mundo, e que ten lugar cada dous anos. Nesta xeira a iniciativa contará con actividades como o concerto de Fetén Fetén, unha conferencia sobre a representación das nubes no cinema, paseos para observar estes fenómenos atmosféricos, voos en parapente ou a exposición de debuxos do ilustrador e historietista francés Troubs. Ademais, inaugurarase un cianómetro, aparello deseñado para medir o azul do ceo que quedará instalado na propia granxa.
