Cartel do certame
Cintadhesiva, Igmig, Mounqup, Pardo e Samarúas son as cinco bandas finalistas que optan á novena edición do concurso musical da Deputación da Coruña que leva por vez primeira o nome do músico Fran Pérez "Narf". Un xurado composto por MJ Pérez, Uxía, Aída Saco, Sergio Tannus e Ánxela Baltar -do grupo Bala, gañador da anterior edición- presidido pola vicepresidenta e responsábel da área de Cultura da Deputación da Coruña, Goretti Sanmartín Rei, decidiu seleccionar ás cinco bandas como finalistas ao IX Concurso Fran Pérez "Narf". A banda gañadora decidirase nunha actuación ao vivo diante do xurado no concerto coas finalistas que se desenvolverá o vindeiro 15 de setembro na Sala Malatesta de Santiago de Compostela. "A final terá lugar nun espazo que, nos seus inicios como Sala Nasa, estivo moi vinculado á figura de Narf. Tamén ten a ver con este artista que abriu camiños para a renovación a vontade deste premio de recoñecer artistas emerxentes de calquera estilo musical", sinala a vicepresidenta e responsábel da área de Cultura da Deputación da Coruña, Goretti Sanmartín Rei.
