O XIV Feito a Man encherá Compostela de concertos todo o mes

Entre o 3 e o 30 de agosto as rúas e prazas da cidade vella de Santiago acollerán case 80 concertos de artistas locais, galegos e internacionais neste evento que foi premiado como mellor Festival nos Premios Martín Códax de Música 2016. O festival Feito a Man fará desta décima cuarta edición unha ocasión especial dedicando ao desaparecido músico Fran Pérez “Narf” o seu cartel e un concerto especial de homenaxe no que participarán ducias de artistas. Este concerto-espectáculo de nome Camiñar sen fin. Concerto para Narf, terá lugar na Praza da Quintana o día 30 e será un dos dous “de pago” que hai previstos no programa; o outro será tamén no mesmo lugar o día 20 cunha homenaxe ao falecido violinista escocés Angus Grant, membro da banda Shooglenifty que actuará ese día acompañada da Banda das crechas e da agrupación Tanxugueiras. Para poder atender á vasta programación presentada pola Asociación Cultural Cidade Vella para esta edición, que comprende ata tres concertos diariso en diferentes puntos, este ano ponse a disposición do público unha aplicación propia do festival para teléfono móbil IOS e Android que permitirá manterse ao día e tamén, segundo os representantres da asociación, informarse en tempo real en caso de cancelacións ou cambios de ubicación dos concertos, de darse o caso.

O programa foi presentado esta mañá na Praza de Feixoo da capital galega, coa presenza de Manu Rodríguez e Ánxeles Porto pola A.C. Cidade Vella e coa participación da vicepresidenta da Deputación da Coruña, Goretti Sanmartín e do alcalde de Santiago Martiño Noriega, como institucións públicas que apoian o festival. No festival deste ano, o máis longo e abondoso dos celebrados, haberá numerosas bandas e artistas locais e galegos de todos os xéneros musicais así como unha importante presenza de músicas internacionais con artistas de México, Ghana, Colombia, Estados Unidos, Cuba, Canadá, Reino Unido e Portugal. Como novidade deste ano o festival tamén presenta un viño propio, un ribeiro con uva Treixadura que leva etiquetado para o evento. En palabras de Ánxeles Porto, as conmemoracións persoais que se fan este ano, sobre todo ao desaparecido Narf, tan presente na dinamización cultural da cidade, farán desta unha edición moi especial do Feito a Man "como nunca desde o corazón e como nunca a flor de pel".


Seguindo cos sinais de identidade do festival de promover a escena local nestes vintesesi días de programación continuada poderá verse a bandas como Aló Django; Puma Pumku; Som do Galpón; Valentín caamaño Trío, Andhrea & The Black Cats; Mojo experience; Zapa; Pardo; A compañía do ruído; Noé Black & The bang band, etc. Alén disto a oferta de músuica internacional chega ás rúas e prazas da man de bandas como Quique escamilla (Canadá / México); Kyekyeku (Ghana); Kamankola (Cuba); Cygne ( California); Haena (Portugal); Scratchy Sounds (Reino Unido); Dj Najle (Colombia); Kaela Rowan Band (Escocia); Michelle Alany and the Mystics (EEUU); Mongrel State (Irlanda) ou Luiz Caracol (Portugal).