O Castelo de Sobroso, en Ponteareas, sufrirá ao longo dos vindeiros meses importantes traballos de mellora como un paso previo á súa musealización, prevista para 2018. A Deputación de Pontevedra e o Concello de Ponteareas asinaban onte un convenio polo que a primeira destas entidades achegará unha partida de 383.822 euros a obras de conservación e mantemento, limpeza, reparación da edificación, renovación da iluminación, das instalacións e das carpinterías de madeira, segundo sinalaba onte Carmela Silva, presidenta da Deputación. Canda a esta, a entidade provincial destinou previamente outra partida para á mellora do bosque Atlántico que circunda este monumento. Neste caso, as actuacións procurarán naturalizar "o entorno forestal dos xardíns do recinto a través da retirada de especies invasoras, sobre todo acacias" e crear unha senda circular que permitirá coñecer as árbores presentes no lugar.
A suma das actuacións previstas rolda os 524.000 euros ao longo de 2017, segundo informou a propia Deputación. Estes investimentos son o paso previo para as actuacións de musealización do recinto, previstas para 2018, cos que se pretende "convertelo nun centro de atracción turística, cheo de contido e vertebrado arredor da cultura e da natureza", segundo explicou Silva.
